ठगिएका ११ युवा न्यायको खोजीमा

काठमाडौ, वैशाख २२ - हलुका सवारी चालकका रुपमा काम दिइने सम्झौता गराएर
कुवेत लगिएका एघार युवालाई १० महिनायता क्लिनर काममा लगाएर सेवा-सुविधा
समेतमा ठगी गरेको आरोप पुष्टी भएपछि सम्बन्धीत म्यानपावरलाई कारवाही गर्न
कुवेत दुतावासले पत्रचार गरेको छ ।
इम्प्लोएमेन्ट लिंक नेपाल प्रालिलाई बढीमा १ लाख २० हजार रुपैंयासम्म
बुझाएर कुवेत पुगेका नेपाली श्रमिकले आफूसँगको करार-सम्झौताअनुसार काम
नपाएपछि आफूसम्बद्ध म्यानपावरलाई जानकारी गराउँदै आएका थिए । 'तर कहिल्यै
सुनुवाइ भएन । हामी पत्राचार गर्दैछौं, कुवेत आएर समस्या सुल्झाइनेछ'
भन्दै इम्प्लोएमेन्ट लिंकका प्रबन्धक मधुकर रिजालले अल्मल्याएपछि
दुतावासमा गएर घर फिर्ता आएको पीडित युवा शम्भुलाल श्रेष्ठले बताए ।
कुवेतस्थित दुतावासको पहलमा शम्भुलालसहित श्रमिकहरु भीमबहादुर थापा,
चित्रबहादुर बिक, कुला गिरी, कृष्णबहादुर सिंह, प्रकाशराज ढकाल,
श्रीकृष्ण महतो, सरोजप्रकाश खत्री, ताराबीर बोहोरा, धनकुमार
श्रेष्ठ,श्रीकृष्ण महतो र शेख जमाइल मुश्लिम यसै साता काठमाडौं फिरेका
छन् । उनीहरु कुवेतस्थित सेक्युरिटी एण्ड टेक्निकल सर्भिसेज ग्रुपमा
रोजगारीका लागि पुगेका थिए । उनीहरुलाई सम्झौतामा १२० केडी तलब दिने
भनिएकोमा ६० केडी (१८ हजार रुपैंया) मात्रै दिएर क्लिनर काम लगाइएको थियो
।
कुवेतस्थित श्रम सहचारी सृजना तिवारीले बैदेशिक रोजगार बिभागलाई पत्र
लेख्दै यी श्रमिकलाई भनिएबमोजिमको काम र सेवा-सुविधा नदिने म्यानपावरलाई
हदैसम्मको कारवाही तथा क्षतीपुर्ती भराउन पत्र लेखेकी छिन् । 'उताको
कम्पनीले तोकेबमोजिमको काम दिन नसकेर समस्या उब्जिएको हो, यसमा मेरो दोष
छैन,'समस्याबाट उम्कन खोज्दै म्यानपावर प्रतिनिधि रिजालले भने ।